កាលពីថ្ងៃទី១៨ ខែសីហា ឆ្នាំ២០២២ ថ្មីៗនេះ ឯកឧត្តមទេសរដ្ឋមន្រ្ដីក្រសួងសាធារណការ និងដឹកជញ្ជូន ស៊ុន ចាន់ថុល បានលើកជាសំណើរ ដល់សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ឲ្យចាត់កម្លាំងនគរបាលជួយឆ្មក់ចាប់រថយន្ដដែលធ្វើចរាចរណ៍លើដងផ្លូវ ដោយមិនបានបំពេញកាតព្វកិច្ចត្រួតពិនិត្យលក្ខណៈបច្ចេកទេស ឬ ឆៀក។ 

យោងតាមប្រសាសន៍របស់ឯកឧត្តមទេសរដ្ឋមន្ដ្រីក្នុងកិច្ចប្រជុំបូកសរុបលទ្ធផល​ការ​ងារ​សុវត្ថិភាពចរាចរណ៍ផ្លូវគោក ប្រចាំឆមាសទី១ និងលើកទិសដៅការងារឆមាសទី២ ឆ្នាំ២០២២ 

បានឲ្យដឹងថា មកទល់ពេលនេះ ក្នុងចំណោមរថយន្ដ ១ លានគ្រឿងកំពុងចរាចរណ៍ មានរថយន្ដ ៤០% ដែលហួសសុពលភាពឆៀក ហើយមិនចូលមកត្រួតពិនិត្យ ដោយបានគូសបញ្ជាក់ថា “ចំពោះឆៀក ឡាន ៤០ ម៉ឺនគ្រឿង ជិតកន្លះលានគ្រឿង មកដល់ម៉ោងនេះ ដែលមិនទាន់យកមកឆៀក ហួសសុពលភាព គាត់មិនមកទេ ដូច្នេះខ្ញុំបាទ ​សូមគោរពស្នើសុំការអនុញ្ញាតដ៏ខ្ពង់ខ្ពស់ ពីសម្តេច (សម្ដេចក្រឡាហោម ស ខេង) ដើម្បីសហការគ្នាជាមួយខាងនគរបាល អាចធ្វើឆ្មក់ ដូចឆ្មក់ចាប់ផ្លាកលេខក្លែងក្លាយ ចាប់រថយន្ដថា តើគាត់បានឆៀកត្រឹមត្រូវ ឬមិនត្រឹមត្រូវ” “ចុឹងបើនគរបាលគាត់ចាប់ ហើយសួររក​ ចុឹងប្រហែលជាគាត់ (ម្ចាស់ឡាន) អាចរត់ទៅរកឆៀក” ។ 

គួររំឭកផងដែរថា ការត្រួតពិនិត្យលក្ខណៈបច្ចេកទេសយានយន្ដគឺជាកត្ដាសំខាន់មួយដើម្បីកាត់បន្ថយគ្រោះថ្នាក់ចរាចរណ៍ ដោយយោងតាមប្រសាសន៍របស់ ឯកឧត្តទេសរដ្ឋមន្ដ្រីដែលបានលើកឡើងក្នុងពិធីសម្ភោធមជ្ឈមណ្ឌលត្រួតពិនិត្យ លក្ខណៈបច្ចេកទេសយានជំនិះសាខាពោធិសែនជ័យ-អូរដឹម កាលពីពេលថ្មីនេះ បានឲ្យឹងថា គ្រោះថ្នាក់ចរាចរណ៍បច្ចុប្បន្ន ចំនួន ៣.៥% គឺ បង្កឡើងពីកត្ដាយានយន្ដដែលមិនបានយកទៅត្រួតពិនិត្យឲ្យបានត្រឹមត្រូវ ស្របតាមលក្ខណៈបច្ចេកទេស ដូច្នេះហើយ ឯកឧត្តម បានថ្លែងជាសំណូមពរ​ឲ្យបងប្អូនប្រជាពលរដ្ឋអ្នកបើកបរ និងម្ចាស់យានជំនិះដែលមិនទាន់បានបំពេញ កាតព្វកិច្ចឆៀក ប្រញាប់យកយានយន្ដមកត្រួតពិនិត្យដើម្បីសុវត្ថិភាពរបស់ខ្លួនឯង និងអ្នករួមដំណើរផងដែរ។ 

អត្ថបទ៖ Andra